ރާއްޖެއިން މިފެންނަނީ ދީނީ އިލްމުވެރިން ކުރައްވާ ބުރަ މަސައްކަތުގެ ނަތީޖާ!

ރާއްޖެއިން މިއަދު ފެންނަމުން މިދަނީ ރާއްޖޭގައި ތިއްބެވި ދީނީ ޢިލްމުވެރިން، ރާއްޖޭގެ ރައްޔިތުންގެ ދީނީ ހޭލުންތެރިކަން ކުރިއަރުވަން ކުރައްވަމުންގެންދަވާ ބުރަ މަސައްކަތްތަކުގެ ހެޔޮ ނަތީޖާ ކަމަށާއި އެކަމަށް ރައީސުލްޖުމްހުރިއްޔާގެ ހައސިއްޔަތުން " މެޑެލް ޖައްސަވަން" ބޭނުންފުޅު ނޫންކަމަށް ރައީސް ނަޝީދު ވިދާޅުވެފައިވާކަމަށް ޕްރެސް ސެކެޓްރީ މުޙައްމަދު ޒުހައިރު ވިދާޅުވެއްޖެއެވެ.

ތިލަދުންމަތިގައި ހުންނަވައިގެން މިއަދުނޫހަށް ދެއްވި ޚާއްޞަ ބަސްދީގަތުމެއްގައި ޒުހައިރު ވިދާޅުވީ މިއަަހަރުގެ ރިޔާސީ ބަޔާން އެކުލަވާލައްވަން ކުރެއްވެވި މަސައްކަތްތަކުގައި މިނިސްޓްރީ އޮފް އިސްލާމިކް އެފެއަރޒުން ކުރައްވަވާފައިވާ މަސައްކަތްތަކުގެ މައުލޫމާތުވެސް ހޯއްދެވި ކަމަށެވެ. ނަމަވެސް އެކަންކަމަކީ ދީނީ އިލްމުވެރިންގެ އިސްނެންގެވުމުގެ މަތިން ވަރަށް ފުރިހަމައަށް ކުރައްވަވާފައިވާ މަސައްކަތްތަކެއް ކަމަށްވާތީ އާއި އެކަންކަމުގެ ހުރިހާ " ކްރެޑިޓެއް"ގެ ހައްޤުވެރިންނަކީ ރާއްޖޭގައި ތިއްބެވި ދީނީ އިލްމުވެރިން ކަމަށްވާތީ އާއި ދީނީ އިލްމުވެރިން ކުރައްވަވާ ކަންކަމުގެ ތެރެއަށް ވެދެ ވަޑައިގެން ބަސް ވިދާޅުވުމަކީ ރައީސް ނަޝީދު ކުރައްވަން ބޭނުންފުޅުވެވަޑައިގަންނަވާ ކަމަކަށް ނުވާތީ އެކަންކަމުގެ ވާހަކަތައް ރިޔާސީ ބަޔާނުގައި ހިމަނުއްވަން ބޭނުންފުޅު ނުވީ ކަމަށެވެ.

" މިނިވަންކަމާއިއެކު ޚުޠުބާ ވިދާޅުވުމުގެ ފުރުޞަތު ހުޅުވާލެވިފައި އޮތުން، ކޮންމެ ހަފްތާއަކު އައު ޚުޠުބާއެއް ތައްޔާރުކޮށް ރާއްޖޭގެ ހުރިހާ ރަށެއްގާ އެ ޚުޠުބާ ކިޔާނެ ގޮތް ހެއްދެވުން، ފިޤްހް އެކަޑަމީ އުފައްދަވައި އެ އެކަޑަމީގެ މަސައްކަތްތައް ކުރިއަށް ގެންދެވުން، އިސްލާމިކް ފެއަރ ބޭއްވެވުން، މިސްކިތްތައް އަޅައި މަރާމާތުކުރުމަށް ފަންޑު ހޯއްދަވައިގެން ކުރިއަށް ގެންދެވުން، ސްކޫލްތަކުގައި ނަމާދު ކުރާނެ ތަންތަން ހައްދަވަމުން ގެންދެވުން، ދީނީ ކައުންސެލިން ދެއްވަމުންގެންދެވުން، މާލެ އާއި ރާއްޖެތެރޭގައި ފުޅާ ދާއިރާއެއްގައި ދީނީ ހޭލުންތެރިކަން އިތުރުކުރަން މަސައްކަތްކުރުން، މުހިއްމު ދީނީ ފޮތްތައް ޝާޢިއުކުރައްވަމުން ގެންދެވުން " ފަދަ އެތައް އެތައް އަގުހުރި ޚިދުމަތްތަކެއް މިނިސްޓްރީ އޮފް އިސްލާމިކް އެފެއަރޒުން އިސްނަންގަވައިގެން ކުރައްވާ ޚިދުމަތްތަކެއްގެ ގޮތުގައި ކުރައްވަމުންގެންދަވާއިރު އެކަންކަމުގެސަބަބުން ލިބެމުންދާ ކުރިއެރުންތަކުގެ ހައްޤުވެރިންނަކީ އެކަންކަން ކުރައްވަމުންގެންދަވާ ދީނީ ޢިލްމުވެރިން ކަމުގައި ރައީސް ނަޝީދު ޤަބޫލުފުޅު ކުރައްވަވާކަމަށް ވެސް މުޙައްމަދު ޒުހައިރު ވިދާޅުވިއެެވެ.

ދިވެހިރާއްޖޭގެ ތާރީޚުގައި ފުރަތަމަ ފަހަރަށް ބޭއްވުނު އިސްލާމިކް ފެއަރ ހުޅުވައިދެއްވުމުން މިއަދު ނޫހުން ރައީސް ނަޝީދާއި ކުރި ސުވާލެއްގެ ޖަވާބުގައި ވިދާޅުވެފައިވަނީ މިނިސްޓްރީ އޮފް އިސްލާމިކް އެފެއަރޒަކީ ވަރަށް ރަނގަޅަށް އެމިނިސްޓްރީގެ މަސްއޫލިއްޔަތު އަދާކުރަމުންގެންދަވާ މިނިސްޓްރީއެއް ކަމަށެވެ.

އާކައިވް ކުރެވިފައިވާ ނުސްޚާ