ރާއްޖެއަކީ ބައިނަލްއަޤްވާމީ ފޯރަމްތަކުގައި އަޑުއުފުލައި ކަރުދާސް ހުށަހަޅާ ޤައުމަކަށް ވެއްޖެ!
މިހާތަނަށް ރާއްޖެއަކީ ބައިނަލްއަޤްވާމީ ދީނީ ފޯރަމްތަކަށް ހަމައެކަނި މަޖާކުރަން ގޮސް ރާއްޖޭގެ ދީނީ ކަންކަން ތަރައްޤީ ކުރުމުގެ ނަމުގައި ބޮޑެތި އޮޅުވާލުންތައް އޮޅުވާލައިގެން އެކިއެކި ފަރާތްތަކުންް މިލިއެން މިލިއަން ފައިސާ ހޯދުމަށްފަހު އެ ފައިސާ އަމިއްލަކުރާ ޤައުމެއްގެގޮތުގައި އޮތް އޮތުން ނިމުމަކަށް ގެނެސްދެއްވައިފިއެވެ.
މިއަދު ރާއްޖެއިން ބައިނަލްއަޤްވާމީ ފޯރަމްތަކަށް ދަނީ ރާއްޖޭގެ ރައްޔިތުންނަށް ބޭނުންވާ ދީނީ ހޭލުންތެރިކަން އިތުރުކުރުމަށް މަގުފަހިވާނެގޮތް ހަދައި ދިނުމަށް މިނިސްޓްރީ އޮފް އިސްލާމިކް އެފެއަރޒް އިން ކުރަމުންގެންދާ މަސައްކަތްތައް އިތުރަށް ތަރައްކުރެވޭނެ މަގު ފަހިކުރުމަށް މަސައްކަތްކުރުމުގެ އިތުރުން ދުނިޔޭގެ އެހެން ޤައުމުތަކުންވެސް އެ ބައްދަލުވުންތަކުގައި ބައިވެރިވެ ކުރަމުންގެންދާ ފަދަ މަސައްކަތްތައް ކުރުމަށްކަން މިނިސްޓަރ އޮފް އިސްލާމިކް އެފެއަރޒް ޑރ. ޢަބްދުލްމަޖީދު ޢަބްދުލްބާރީ ހާމަކޮށްދެއްވައިފިއެވެ.
އެމަނިކުފާނު ވަނީ މިސްރުގެ އައުޤާފު މިނިސްޓްރީން ބޭއްވި ބައިނަލްއަޤްވާމީ ކޮންފަރެންސްގައި ރާއްޖޭގެ ފަރާތުން ބައިވެރިވެވަޑައިގެން ކަރުދާހެއް ހުށަހަޅާފއެވެ.
ދިވެހިވިންދަށް މައުލޫމާތުލިބިފައިވާގޮތުގައި ޑރ.ޢަބްދުލްމަޖީދު ކަރުދާހެއް ހުށަހެޅުއްވެވީ "އިސްލާމީ ޝަރީއަތުގެ މަޤްސަދުތަކާއި، އަލަށް ކުރިމަތިވާ މައްސަލަތައް" މިނަމުގައި މިސްރުގެ އައުޤާފު މިނިސްޓްރީން ބޭއްވި ބައިނަލްއަޤްވާމީ ކޮންފަރެންސްގައެވެ.
ފެބްރުއަރީ މަހުގެ ބާވީހުން ފަންސަވީހަށް މިސްރުގެ ވެރިރަށް ޤާހިރާގައި ބޭއްވި މިކޮންފަރެންސްގައި އެމަނިކުފާނު ކަރުދާހެއް ހުށަހެޅުއްވީ "އިސްލާމީ ޝަރީއަތުގައި އަޤީދާގެ މިނިވަންކަމާއި، އިންސާނީ ޙައްޤުތަކާއިބެހޭ ބައިނަލްއަޤްވާމީ މުޢާހަދާގައި އެކަން އޮންނަ ގޮތް" މިމައުޟޫޢުގެ މައްޗަށް ކަމަށްވެސް ވަނީ މައުލޫމާތު ލިބިފައެވެ.
"އިސްލާމީ ޝަރީއަތުގެ މަޤްސަދުތަކާއި، އަލަށް ކުރިމަތިވާ މައްސަލަތައް" މިނަމުގައި މިސްރުގެ އައުޤާފު މިނިސްޓްރީން ބޭއްވި ބައިނަލްއަޤްވާމީ ކޮންފަރެންސްގައި ރާއްޖޭއިން ބައިވެރިވެވަޑައިގެންނެވި ވަފުދުގެ އިސްބޭފޅެއްގެ ހައިޞިއްޔަތުން، މިނިސްޓަރ އޮފް އިސްލާމިކް އެފެއާޒު ޑރ. އަބްދުލްމަޖީދު އަބްދުލްބާރީ ވަނީ މިކޮންފަރެންސްގައި ީ އެއްސެޝަންގެ ރިޔާސަތު ބަލަހައްޓަވާފައެވެ.
މިދަތުރުފުޅުގައި މިނިސްޓަރ، އަޒްހަރު ޔުނިވަރސިޓީއަށް ޒިޔާރާތް ކުރެއްވުމުގެ އިތުރުން ޤާހިރާގައި ކިޔަވަން ތިބޭ ދިވެހި ކުދިންނާވެސް ވަނީ ބައްދަލުކުރައްވާފައެވެ.
ރާއްޖޭގެ ވެރިކަމުން މައުމޫނު ވަކިކޮށްފިނަމަ އިސްލާމީ ޤައުމުތަކުގެ ، ޚާއްޞަކޮށް މިޞުރު ފަދަ ޤައުމުތަކާއި ރާއްޖެއާއި އޮތް ގުޅުން ކެނޑި ރާއްޖެ ބިކަ ހާލުގައި ޖެހޭނެކަމަށް މައުމޫނު ބުނިނަމަވެސް ފެންނަމުންދަނީ ރާއްޖެއާއި އިސްލާމީ ޤައުމުތަކާއި ޖަމާއަތްތަކުގެ ގުޅުން އިތުރަށް ބަދަހިވަމުންދާތަނެވެ.
މިކަމަށްޓަކައި މިނިސްޓްރީ އޮފް އިސްލާމިކް އެފެއަރޒް ހިންގަވަން ތިއްބެވި ވެރިންނަށް ފަށްފަށުން މަރުހަބާ އާއި މުބާރިކް ބާދު އަރިސް ކުރަމެވެ. އަދި އެމިނިސްޓްރީގެ މަސައްކަތްތައް ފުރިހަ އިޚުތިޔާރުގައި ކުރިއަށް ގެންދެވުމުގެ އިޚުތިޔާރު ދެއްވާފައިވާކަމަށްޓަކައި މިއަދުގެ ސަރުކާރަށް ފަށްފަށުން ޝުކުރު އަދާކުރަމެވެ!
ކޮމެންޓްތައް
މިހާތަނަށް އެއްވެސް ކޮމެންޓެއް ނެތް.
ކޮމެންޓް ކުރެއްވުމަށް ގޫގުލް އެކައުންޓުން ވަދެވަޑައިގަންނަވާ