މަދަނީ ޖަމިއްޔާތަކުންވެސް އެންމެ ކަންބޮޑުވަނީ 1އަހަރު ވީއިރުވެސް އަނިޔާ ލިބިފައިވާ މީހުންގެ މައްސަލަތައް ބަލަން ނުފެށޭތީ ނޫންތޯ!

މައުމޫނުއެވެ ކަލޭގެ ފޭރާން ބަދަލުކުރުމަކުން ރާއްޖޭގެ ރައްޔިތުންގެ ހިތްތަކުގައި ކެކި އުތުރި އަަރމުންއަންނަ އިޙްޞާޞްތަކަށް އެއްވެސް ބަދަލެއް ނާންނާނެއެވެ. ރައްޔިތުންގެ ހަށިތަކުގައި އަޅަމުންދާ ވޭން ގަދަކަމުންނެވެ. ހަށިތަކަށް ވަމުންދާ ތަދު ގަދަކަމުންނެވެ.

މިކަންކަމާއި އިންތިހާއަށް ކަންބޮޑުވެ މަދަނީ ޖަމިއްޔާތަކުން ގެންދަނީ ބަޔާންތައް ނެރެމުންނެވެ. ރައްޔިތުން މަގުތަކުގައި ކޮޅުކޮޅަށް ދުވަނީއެވެ. މައްސަލަ ބަލައިދޭނެ ފަރާތެއްވޭތޯ ސަލާންޖަހައި އާދޭސް ކުރަނީއެވެ!

މިހާރުގެ ސަރުކާރަށް އެއް އަހަރުފުރި އިތުރުވެގެންދާއިރުވެސް ކުރީގެ ވެރިކަމުގައި އަނިޔާ ލިބިފައިވާ އެއްވެސް މީހެއްގެ މައްސަލަތައް ބެލުމަށް އެއްވެސް އެދެވޭ ފިޔަވަޅެއް އަޅާފައިނުވާކަމަށް ހިޔުމަން ރައިޓްސް އެންޑް ސިވިލް ޖަސްޓިސް ނެޓްވާރކް އިން ހާމަކޮށްފިއެވެ.

އެ ޖަމިއްޔާއިން އެކަން ބަޔާންކޮށް ނެރުނު ނޫސްބަޔާނުގައިވަނީ ފާއިތުވީ 30 ވަރަކަށް އަހަރު ވެރިކަމުގެ ބާރުގެ ނުފޫޒުން އަދުލު އިންޞާފުން ބޭރުގައި އަނިޔާ ލިބިފައިވާ މީހުންނަށް ޙައްޤު ބަދަލު ހޯދައިދީ އަނިޔާވެރި ފަރާތްތައް ޝަރީއަތުގެ ކުރިމައްޗަށް ނެރުމަށް، މިހާރު ރާއްޖޭގައި ވެރިކަން ކުރަމުންގެންދާ ސަރުކާރުން އެއްވެސް އެދެވޭ ފިޔަވަޅެއް އަޅާފައިނުވުމަކީ އެ ޖަމިއްޔާއިން ހިތާމައާއިއެކު ފާހަގަކުރާ ކަމެއް ކަމަށެވެ.

" 30 އަހަރުގެ ޚުދުމުޚުތާރު ވެރިކަމެއް ނިމި، ޑިމޮކްރެޓިކް އުޞޫލުން ވެރިކަމެއް ކުރަންފެށިތާ އަހަރަކަށްވުރެ ގިނަ ދުވަސް ފާއިތުވެގެން ދިއައިރުވެސް ކުރީގެ ސަރުކާރުގެ އަނިޔާވެރިކަން ތަހައްމަލްކޮށްފައިވާ މަޡްލޫމުންގެ ޝިކާޔަތަށް އެއްވެސް އިޖާބައެއް ދީފައި ނެތުމުން " އަނިޔާލިބިފައިތިބި މީހުންގެ ޙައްޤުގައި ބައަކު އިސްނަގައިގެން އިޚްލާޞްތެރިކަމާއިއެކު މަސައްކަތްތަކެއް ކުރަންޖެހިފައިވާކަން ނޫސްބަޔާނުގައި ފާހަގަކޮށްފައިވެއެވެ.

މިފަދަ މަޡްލޫމުންގެ ހާލަތަށް ހަމްދަރުދީވެ، ވެރިކަން ކުރަމުންގެންދާ ސިޔާސީ ޕާޓީގެ ގިނަބަޔަކު އިސްވެތިބެގެން އުފައްދަން މަސައްކަތްކުރާ ޓޯރޗަރ ވިކްޓިމްސް އެސޯސިއޭޝަން އިން ފަށްޓަވާ މަސައްކަތްތަކަށް އެޖަމިއްޔާ ގެ ފުރިހަމަ އެއްބާރުލުން ދޭނެކަމަށްވެސް ބަޔާންކޮށްފައިވެއެވެ.

ޓޯރޗަރ ވިކްޓިމް އެސޯސިއޭޝަން އިން މަސައްކަތްތައް ކުރިއަށް ގެންދާއިރު އެއްވެސް ކަމެއްގައި ސިޔާސީ ފައިދާއެއް ނުނަގައި އަނިޔާލިބިފައިތިބި މީހުންގެ ޙާލަތަށް ރިޢާޔަތްކޮށް ތެދުވެރިކަމާއި އިޚުލާސްތެރިކަމާއިއެކު މަސައްކަތް ކުރުމަށް ހިޔުމަން ރައިޓްސް އެންޑް ސިވިލް ޖަސްޓިސް ނެތްވާރކް އިން ގޮވާލާކަމަށްވެސް ނޫސްބަޔާނުގައި ހާމަކޮށްފައިވެއެވެ.

ރާއްޖޭގައި އެކި ދުވަސްވަރު އެކިއެކި ގޮތްގޮތުން ޙައްޤު ނޫން އަދަބުދީ އަދި ބޮޑެތި އަނިޔާތައް ލިބިފައިވާ ވަރަށް ގިނަ ބަޔަކު އެމީހުންގެ މައްސަލަތައް ބަލައިދިނުމަށް އެދި އެކިއެކި ފަރާތްތަކަށް ގެންދަނީ އެމީހުންގެ މައްސަލަތައް ހުށަހަޅަމުންނެވެ. ނަމަވެސް އެފަދަ އެއްވެސް މައްސަލައެއް ބަލައި، އަނިޔާވެރިން އަދުލު އިންޞާފުގެ ކުރިމައްޗަށް ގެންދެވިފައި ނެތްކަމަށް ބުނެ ގިނަބަޔަކު ގެންދަނީ ނުރުހުން ފާޅުކުރަމުންނެވެ.

މިކަން މިގޮތަށް ވުމަށް މެދުވެރިވެފައިވާ އެންމެ ބޮޑުއެއް ސަބަބަކީ ރައްޖޭގެ ހިޔުމަން ރައިޓްސް ކޮމިޝަންގެ ޤާނޫނުގައި " އެކޮމިޝަނަށް ބެލުމުގެ އިޚުތިޔާރު ދީފައިވަނީ 2000 ވަނަ އަހަރުގެ ފަހުގެ މައްސަލަތައް ކަމަށް " ކަނޑައަޅާފައި އޮންނަ އޮތުމެވެ. އަދި އެ މައްސަލަތައް ބަލައި ގެއްލިފައިވާ ހައްޤުތައް ހޯދައިދޭން މަސައްކަތްކުރާ އެހެން ފަރާތެއް ނެތުމެވެ.

ދާދިފަހުން ޑރ. ޝަހީދު ވިދާޅުވެފައިވަނީ ރާއްޖޭގެ އެއްވެސް އިދާރާއަކުން ބެލެން ނެތް މައްސަލަތައް ބައިނަލްއަޤްވާމީ އދގެ އިންސާނީ ޙައްޤުތަކާއިބެހޭ މައި އިދާރާއިން ބަލައިދިނުމުގެ ފުރުޞަތުތަކެއް މިއަހަރުގެ ތެރޭގައި ރާއްޖޭގެ ރައްޔިތުންނަށް ލިބިގެންދާނެ ކަމަށެވެ.

އާކައިވް ކުރެވިފައިވާ ނުސްޚާ