ކަަރަންޓް ބިލަށް ސުނާމީ އަރައިފި! ނިކަމެތިން ޣަރަޤުވެއްޖެ!

ސްޓެލްކޯ އިން ކަރަންޓްގެ އަގަށް ގެނައި ބަދަލާއިގުޅިގެން ބިލަށް ސުނާމީ އަރައިފިއެވެ. މަހަކު 1000 ރުފިޔާ ދައްކަމުން ގެންދިއަ ގޭގޭގެ ބިލަށް 2000، 2500 ރުފިޔާ އަރަންފެށުމުން ރައްޔިތުން އެކަމުން ސަލާމަތްވުމަށް ކޮޅުކޮޅަށް ދުވަންފަށައިފިއެވެ.

ބިލަށް ބަދަލުގެންނަމުން ސްޓެލްކޯއިން ދިން މައުލޫމާތާއި ބިލްތައް އަންނަމުންދާގޮތާއި އުޑާއި ބިމާހައި ތަފާތުވެއްޖެއެވެ. އެެހެންކަމުން ގޭގޭގެ ސްވިޗް އޮންކޮށްލަންޖެހޭ ކޮންމެ ފަހަރަކު އެކަން މިހާރު ވެފައިވަނީ ބޮޑު ބިރަކަށެވެ. ނަމަވެސް އެއީ ކުރަން މަޖުބުރުވާ ކަމަކަށްވާތީ އަތްތުރުތުރުއަޅަމުންވެސް ކުރަން މަޖުބުރު ވަނީއެވެ.

ހޮސްޕިޓަލެއްގެ އިންޓެންސިވް ކެޔަރ ޔުނިޓަށް މީހަކު ވައްދަން ޖެހުމުން ބިރުގަނެ ތުރުތުރު އަޅަންޖެހޭ ދެކަމެއް އޮވެއެވެ. އެއްކަމަކީ ބަލިމިހާގެ ޞިއްޙީ ޙާލަތެވެ. އޭނާގެ ފުރާނައަށް ކުރިމަތިވެދާނެ ނުރައްކަލެވެ. ހަމައެފަދައިން ބިލަށް ދައްކަންޖެހޭނެ ފައިސާގެ އަދަދެވެ. އެ ފައިސާ ހޯދާނެ ގޮތެކެވެ.

ގޭގޭގެ ކަރަންޓުގެ ހާލަތުވެސް މިހާރު މިވަނީ މިދެންނެވިފަދަ ޙާލަތުގައެވެ. ރައްޔިތުންނަށް ކަރަންޓު ބިލް ވަނީ ބޮޑު ބިރަކަށް ވެފައެވެ. ރީޑިންގ ނަގަން އައުމުން އެ އަންނަ މީހާ ފެނުމުން ފުރޭތައެއް ދެކެ ގަންނަބިރު ގަނެއެވެ. ނަމަވެސް ކުރާނީ ކިއްތޯއެވެ؟ ގެއަށް ނުވައްދައިފިނަމަ ދެންދާނީ ބޭރުން ކަަރންޓު ކަނޑާލާފައި ވިއްޔާއެވެ.

ސްޓެލްކޯއިން ގެނައި ބަދަލުގައި ވިސްނަންޖެހޭނެ ކަންތައްތަކެއް އެބަހުއްޓެވެ. ނިކަމެތިންނަކީ ކޮބައިކަމެވެ. ނިކަމެތިން ކަނޑައެޅުމުގެ މިންގަނޑެވެ. މިދަންނަވަނީ މިސާލެކެވެ.

އަހްމަދު އަކީ 3 ދަރިންނާއި އަންބަކު ގޮވައިގެން ދިރިއުޅޭ މީހެކެވެ. ޢާއިލާގައި 6 މީހުން އެބަތިއްބެވެ. އަޙްމަދުގެ މުސާރައަކީ މަހަކު 10.000 ރުފިޔާއެވެ. ވަރަށް ބޮޑު މުސާާރައެކެވެ.

އަޙްމަދަކީ ފަޤީރުންގެ ތެޜޭގައި ހިމެނޭ މީހެއް ނޫނެވެ. ސަބަބަކީ ސަރުކާރުން ޤަބޫލުކުރާ ގޮތުންނަމަ އަހްމަދަކީ ފަޤީރަކަށް ވާނީ އަޙްމަދަކީ އުމުރުން 18 އަހަރު ނުފުރޭ 4 ދަރިންނާއި އަންބަކު ގެންގުޅޭ މީހަކަށްވެފައި އަހްމަދުގެ މުސާރައަށް މަހަކު 8،100 ރުފިޔާ ނުލިބޭ ނަމައެވެ.

އަޙްމަދު ދިރިއުޅެނީ ކުށްޔަށް ކޮޓަރިއެއް ހިފައިގެންނެވެ. އަޙްމަދަކީ މާލޭ މީހެއް ނަަމވެސް ބިންކޮޅެއް ނެތް މީހަކަށްވާތީއެވެ. ކޮތަރީގެ ކުއްޔަކީ މަހަކު 5،000 ރުފިޔާއެވެ. ކުރިން ކަރަންޓު ބިލަސް އަރަނީ މަހަކު 1000 ރުފިޔާއެވެ. އެދުވަސްވަރު އަހްމަދުގެ ހުރިހާކަންކަން ކުރުމަށް ކޮތަރިކުއްޔާއި ކަރަންޓު ބިލް ދައްކާފައި 4000 ރުފިޔާއެވެ. ކެއިން ބުއިމާއި ފެން ބިލައި ދެންވެސް ކުރަންޖެހޭ ހުރިހާ ޚަަރަދެއް ކުރަނީ މިދެންނެވި 4000 ރުފިޔާއިންނެވެ.

ނަމަވެސް މިހާރު މިވީގޮތަކީ ކަަރަންޓު ބިލް މަހަކު 2500 ރުފިޔާއަށް ބޮޑުވީއެވެ. އަހްމަދުގެ ކޮޓަރި ކުއްޔާއި ކަރަންޓް ބިލް ދެއްކިމާ ބާކީ އޮތީ އެންމެ 2500 ރުފިޔާއެވެ. ސުބުޙާނަﷲ އެވެ. އަޙްމަދަށް ކުރިމަތިވެފައިވާ ޙާލު ސަރުކާރުގެ ވެރިންނަށް އިޙްޞާޞް ކުރެވޭނީ އެމީހުންގެ އަތަށް މަހަކު 2500 ރުފިޔާ ދީފައި އަނބިދަރިން ގޮވައިގެން މަސް ދުވަހު އުޅެން ޖެއްސުމުންނެވެ.

ތެދުފުޅެކެވެ. މޫސަ އަށް އަސަރެއް ނުކުރެއެވެ. އޭނާގެ ގެ ހުރީ 10 ބުރިއަަސެވެ. އެތެނުން ހަތްބުރި ހުރީ ބުރިއެއް މަހަކު 20،000 ރުފިޔާއަށް ކުށްޔަށްދީފައެވެ. ތިރީ ދެބުރި ހުރީ ސްޕަމާރކެޓެއް ހިންގުމަށް އެއް ލައްކަ ރުފިޔައަށް ކުއްވަށް ދީފައެވެ. ވީމާ މޫސައަށް އެނާ 24 ގަޑިއ ިރު ދެފައިދަމާފައި ނިދަން އޮތް ނަމަވެސް އޭނާގެ ގެއިން މަހަކު 240،000 ( ދެލައްކަ ސާޅީސް ހާސް ރުފިޔާ ލިބޭ ވިއްޔާއެވެ. ވީމާ މޫސަގެ ކަރަންޓު ބިލަށް އަދި 10،000 ރުފިޔާ އިތުރުވިނަމަވެސް ކުރާނީ ކޮން އަސަރެއްތޯއެވެ؟ އެންމެ ކުޑަމިނުން އިންކަމް ޓެކްސް ވެސް ދައްކަންޖެހެނީއެއް ނޫންވިއްޔާއެވެ!

އަޙްމަދު އާއި މޫސަގެ ވާހަކައަކީ ހަމަ ހަޤީޤީ ދެވާހަކައެވެ! އެދެމީހުންގެ ހަޤީޤީ ހާލަތެވެ. އިރާދަކުރެއްވިއްޔާ ދެން ގެނެސްދޭނީ ސިއްތިފުޅަށް ޖެހިފައިވާ ހާލެވެ!

އާކައިވް ކުރެވިފައިވާ ނުސްޚާ