ހޮސްޕިޓަަލަށް ގެންދިޔައީ ފިރިމީހާގެ ޖާރިޔާއެއްތަ؟ ނޫނީ އަންހެން ކުދިން ވިއްކާ ވިޔަފާރި ކުރާ އަންހެނެއްތަ؟

ޖާރިޔާއިން ގެންގުޅޭކަމަށް އަދި މިހާތަނަށް ލިބިފައިވާ ހަމައެކަނި މައުލޫމާތަކީ ޑޮކްޓަރެއްކައިރީގައި އެއީ އޭނާގެ ފިރިމީހާގެ ޖާރިޔާއެއް ކަމަށް މޫނު ބުރުގާ އަޅައިގެން ހުރި އަންހެނަކު ބުނިކަމަށް ބުނާ ބުނުމެކެވެ.

އެ އަންހެން މީހާގެ މޫނެއް ނުފެނެއެވެ. އަދި ޖާރިޔާގެ މޫނެއް ވެސް ނުފެނެއެވެ. އެހެންކަމަށްވާއިރު އެ އަންހެނަކު އެބުނަނީ ކިހާވަރެްއގެ ތެދެއްކަން ސާބިތު ކުރެވެން އޮތީ ކޮން ގޮތެއްތޯއެވެ؟

މިކަމަކީ މުޅި ޤައުމުގައި މިވަގުތު އެންމެ ބާރަށް ދެކެވޭ އެއް ވާހަކައަސް ވެފައިވާއިރު މިކަމަކީ މާތްވެގެންވާ އިސްލާމް ދީން ބަދުނާމުކުރުމަށް ދެކެވޭ ވާހަކައެއްކަމަށް ޤަބޫލުކުރެވޭ ކަންތައްތަކެއް ވެސް އެބަހުރިކަން ޤަބޫލުކުރަން ޖެހެއެވެ.

ފައިތުވީ މައުމުނީ ވެރިކަމުގައި ކުޑަކުދިން ވިއްކައިގެން ވިޔަފާރި ކުރުމާއި ކުޑަކުދިން އަމިއްލައަށް ހަށި ވިއްކުންފަދަ ކަންތައްތައް މިވަނީ ޢާއްމު ވެފައެވެ. މުޅި ޤައުމަށް ފެތުރިފައެވެ.

އެހެންކަމަށްވާއިރު މޫނު ބުރުގާ އަޅައިގެން އެ ހުރި އަންހެން މީހާ އަކީ ކުޑަކުދިން ވިއްކައި ވިޔަފާރިކުރާ މީހަކު ނޫންކަން އެނގެނީ ކިހިނަކުންތޯއެވެ؟

އަމިއްލައަށް ހަށި ވިއްކަން ނުކުމެ އުޅޭ އަންހެން ކުއްޖަކު ބަލިވުމުން ނުވަތަ ބަލިވެ އިނުމުން އޭނާގެ ރައްޓެހި އަންހެނަކު ގޮވައިގެން ހޮސްޕިޓަލަށް ދިއައީ ނޫންކަން އެނގެނީ ކިހިނަކުންތޯއެވެ؟

މޫނުބުރުގާ އެޅުމަކީ މާތްވެގެންވާ އިސްލާމް ދީނުގައި މުސްލިމް އަންހެނުން ހެދުން އަޅަން އޮތް އެންމެ ފުރިހަމަ ގޮތެވެ. ކީރިތި ޤުރުއާނުގައި ވަޙީކުރައްވަވާފައިވާގޮތެވެ. އެއީ އެއްވެސް ޝައްކެއް އޮތްކަމެއް ނޫނެވެ. ކީރިތި ޤުރުއާނުގެ އާޔަތްތަކުން އެކަން ވަރަސް ފުރިހަމައަށް ސާބިތުވާތީއެވެ.

މާތްﷲ އެންގެވި ގޮތުގައި އުލެން ބޭނުން އަންހެނުންގެ އަދަދު އިތުރުވަމުންދާ ކަމީ އުފާކުރަންޖެހޭ ކަމެކެވެ. މާތްﷲ އެންގެވި ގޮތުގައި ހެދުން އަޅައިގެން ހެޔޮ ނިޔަތުގައި ނުކުމެ އުޅޭ ހުރިހާ އަންހެނުންނަށް އަޅުގަނޑުމެން މަރުހަބާ ކިޔަމެވެ.

ކަން މިހެން އޮތް ނަމަވެސް ކޮންމެ ކަމަކުންވެސް ނާޖާއިޒު ފައިދާތަކެއް ނަގާ ބަޔަކު އަބަދުވެސް އުޅޭ ފަދައިން މިއަދުވެސް އެބައުޅޭކަން އެއީ އެނގޭކަމެކެވެ. މޫނު ހާމަކޮށްގެން ނުކުމެ ފިރިހެނުން ހޯދަން އުޅެެން ލަދުގަންނަ އަންހެނުން އެމީހުންގެ ޖިންސީ އެދުން ފުއްދުމަށްޓަކައި ފިރިހެނުން ހޯދަން މަގުތަކަށް ނުކުންނައިރު މޫނު ބުރުގާ އަޅައިގެން ތިބޭކަން ވަނީ ސާބިތުވެފައެވެ.

ކޮންމެވެސް ކުށެއްކޮށްގެން ގޭގައި ބަންދުކުރެވިފައިތިބޭ މީހުން މޫނު ބުރުގާ އަޅައިގެން ނުކުމެ އުޅޭކަން އެއީވެސް ސާބިތުވެފައިވާކަމެކެވެ.

ވީމާ މޫނުބުރުގާ އަލައިގެން އަންހެނަކު ހޮސްޕިޓަަލަށް ގޮސް ދައްކާ ކޮންމެ ވާހަކައަކީ އެންމެ ޞައްޙަ ވާހައަކަށް ނުވުމުގެ ފުރުޞަތު ވެސް އެބައޮތްކަން ވިސްނާލުމަކީ އެންމެ ރަނގަޅު ކަމެކެވެ.

ޖަރިޔާއިން ރާއްޖޭގައި ގެންގުޅޭކަމަށް ތުހުމަތު ކުރެވިއްޖެނަމަ އެކަމެއް ބަލައި ތަޙްޤީޤުކުރެވެން ޖެހޭނެއެވެ. އިބްނު ބަޠޫޠާ ރާއްޖެ އައުމުން އެނާއަށް ޖާރިޔާ އިން ހަދިޔާ ކުރެވުނު ވާހަކަ އޭނާ ލިޔެފައި އޮވެއެވެ. ނަމަވެސް އަޅުގަނޑުމެންގެ ހަޔާތަކު އެފަދަ ކަމެއް ފެނިފައެއް ނެތެވެ. އެެހެންކަމުން މިހާތަނަށް އެކަމަކީ ރާއްޖޭގައި އޮތް ކަމެއްކަމަށް ޤަބޫލުކުރެވޭކަށް ނެތެވެ.

އަޅުގަނޑުމެންނާއި ހަމައަސް އައިއިރު މި ޤައުމުގައި ނެތްކަމެއް އަޅުގަނޑުމެންގެ ޒަމާނުގައި އުފެދި އާލާ ވެއްޖެނަމަ އެކަމުގެ ޒިއްމާ އަޅުގަނޑުމެން އުފުލަންޖެހޭނެއެވެ. މާތްﷲގެ ހަޟްރަތުގައި އެކަމަށް ޖަވާބުދާރީ ވާން ޖެހޭނެއެވެ. އެކަން ހުއްޓުވަން އަޅުގަނޑުމެން ކުރިކަމެއްގެ ވާހަކަ ދަންނަވަން އެބަޖެހެއެވެ.

ވީމާ ޖާރިޔާ އިން ރާއްޖޭގައި ގެންގޫޅޭނަމަ އެކަން ހުއްޓުވަން މަސައްކަތް ކުރުމަކީ އަޅުގަނޑުމެން އެންމެން ސަމާލުކަން ދޭންޖެހޭނެ ކަމެކެވެ. ހަމައެފަދައިން މައުމޫނީ ވެރިކަމުގައި މިޤައުމުގައި ޢާއްމުކޮށްފައިވާ ފާހިޝް ޢަމަލުތަކާއި މުންކަރާތްތަކުން މުޖުތަމައު ސަލާމަތްކުރަންވެސް މަސައްކަތްކުރަން އެބަޖެހެއެވެ. މިކަންކަމަށް ސަމާލުކަން ދިގެން ނޫނީ ދެދުނިޔޭގެ ބާއްޖަވެރިކަން އަޅުގަނޑުމެންނަށް ލިބުމެއްނެތްކަމާއިމެދު ވިސްނައި ފިކުރުކުރުން އޮތީ އަޅުގަނޑުމެންގެ އަތްމަތީގައެވެ.

އާކައިވް ކުރެވިފައިވާ ނުސްޚާ