ރަމަޟާން މަހާއި ރޭ އަޅުކަން: 8 ރަކްޢަތް ކޮށްލުމަށްފަހު ތަރާވީޙު ނަމާދު ނިންމައިލެވެން އެބައޮތްތޯއެވެ !

8 ރަކްޢަތް ކުރުމުން ތަރާވީޙު ނަމާދު ކުރެވުނީ ކަމަށް ބަލައި މަޤްބޫލު އުޒުރެއްނެތި ވެސް މިސްކިތުން ފައިބައިގެންދާ މީހުންގެ އަދަދު އަޅުގަނޑުމެންގެ ތެރޭގައި ވަރަށް ގިނަކަން އެއީ ފެންނަމުންދާ ކަމެކެވެ. މި އަަހަރު މިކަން ކުޑަކަން ފާހަގަކުރެވުނު ނަމަވެސް އަދިވެސް އެގޮތަށް އަމަލު ކުރެވޭ ބަޔަކު އަޅުގަނޑުމެންގެ ތެރޭގައި އެތިބިކަން ފާހަގަކުރެވެއެވެ.

އެހެންކަމުން ކައުއިތުރު ރަސޫލާގެ ޙަދީޘްފުޅުން އެކަން ފެންނަން އޮތްގޮތައިމެދު ބަލައިލުމަކީވެސް މިފަދަ ރޭތަކެއް ފާއިތުވަމުންދާއިރު ކުރުން އެންމެ ރަނގަޅު ކަމެކެވެ.

ކައުއިތުރު ރަސޫލާގެ ހަދީީޘްފުޅެއްގެ މާނައިގައިވެއެވެ. ނަމާދު ( ތަރާވީޙު ނަމާދު ) ނިމެންދެން އިމާމް އާއި އެކު ހުރެއްޖެ މީހާއަށް އެރޭގައި ރޭ އަޅުކަން ކުރުމުގެ ޘަވާބު ލިބޭނެތެވެ. " ( ހިދާޔަތުގެ އަލި 40)

ރަަމަޟާން މަހަކީ ރޭ އަޅުކަން އެމީހަކަށް ކުރެވުނު އެންމެގިނައިން ކުރަންވީ މައްސަރަވެ. މިފަދަ މައްސަރެއްގައި ރޭ އަޅުކަން ކުރުމުން ލިބެންއޮތް ޘަވާބު ނުހަނު ފަސޭހަ މަގަކުން ލިބެން އޮއްވައި ދޫކޮށްލުމަކީ ކުރަން ހެޔޮވެދާނެ ކަމެއް ބާވައެވެ!

މާތްﷲ އީ އަޅުގަނޑުމެންކުރާ ހެޔޮ އަމަލުތަކަށް ޘަވާބާއި ދަރުމަ ދެއްވުމުގައި ދީލަތިވަންތަ އިލާހް އެވެ. ވީއިރު އިމާމް އާއި އެކުގައި ތަރާވީޙު ނަމާދުކޮށްގެން ފައިބަން މިސްކިތުގައި މަޑުކޮށްލަން އަޅުގަނޑުމެން ފަސްޖެހެންވީ ކީއްވެގެންތޯއެވެ! ޢާއްމު ގޮތެއްގައި ތަރާވީޙް ނަމާދު ކުރުމަށް ނަގަނީ 30 މިނިޓް އާއި 45 މިނިޓުގެ ވަގުތަކަށްވާއިރު މިއީ ދިގު ވަގުތެއް ކަމަށް ބަލައި މިކަމަށް އަޅުގަނޑުމެން ފަސްޖެހެންވީ ކީއްވެގެންތޯއެވެ!

ތިމާ އަދާކުރާ ވަޒީފާގެ ގޮތުން ނުވަތަ އެހެން ވެސް ގޮތަކުން އަވަސްއަވަހަށް މިސްކިތުން ނުފައިބައިފިނަމަ ތިމާއަށް ބޮޑު ގެއްލުމެއް ލިބިދާނެ ކަމުގެ ބިރު އޮތްމީހުންނާއި ޞިއްޙީ ގޮތުން ނުކުޅެދޭ މީހުން ފިޔަވައި އެހެން އެންމެންނަކީ ވެސް މިދެންނެވި ފަދައިން ތަރާވީޙު ނަމާދުގައި އިމާމާގެ ފަހަތުގައި ތިބެގެން އެރޭ ގެ ރޭ އަޅުކަންކުރުމުގެ ޘަވާބާއި ދަރުމަ ހާޞިލްކުރެވިދާނެ މީހެކެވެ.

މާތްﷲ އަށް ބިރުވެތިވުމާއި ތަޤްވާވެރިވުމަށް އަޅުގަނޑުމެން ކުރިމަތިލައިފީމުއެވެ. މިއަަހަރުގެ ބަރަކާތްތެރި ރަމަޟާންމަހަށް އަޅުގަނޑުމެން މަރުޙަބާ ކިޔައިފީމުއެވެ. ތިން ރޯދަ ހިފައިފީމުއެވެ. މިއަދު އަޅުގަމެން މިތިބީ ހަތަރުވަނަ ރޯދަ ހިފުމުގައެވެ. އެހެންކަމުން އަޅުގަނޑުމެންގެ އަމަލުތަައް ވެސް އެންމެ ފުރިހަމަ ގޮތުގައި ބަހައްޓަން މަސައްކަތްކުރަން ޖެހެއެވެ. ކުރާ ކޮންމެ އަމަލަކީ ހެޔޮ އަމަލަކަށް ހެދުމަށް މަސައްކަތްކުރަންޖެހެއެވެ.

އައްޝައިޚު މުޙައްދު ޝަހީމް ޝަހީމް ޢަލީ ސައީދު ރޯދަ އާއި ބެހޭގޮތުން ވިދާޅުވެފައިވަނީ " ރަމަޟާންމަހުގެ ރޯދަ އަކީ އިސްލާމް ދީނުގެ ރުކުނެއް ކަމަށާއި ރަމަޟާންމަހު ރޯދަ ހިފުމަކީ އެންމެހައި މުސްލިމުންގެ މައްޗަށް ފަރުޟެއް ކަމުގައި މާތްﷲ ކަނޑައަޅުއްވަވާފައިވަނީ މާތްﷲއަށް ތަޤްވާ ވެރިވުމަށް " ކަމަށެވެ. އަދި " ހަމަ ކަށަވަރުން ތަޤްވާ ގެ މާނައިގައި ވަރަށް ގިނަ ކަންތައްތައް ހިމެނިގެންވާ" ކަމަށާއި ތަޤްވާ ގެ މާނައިގައި ވަރަށް ގިނަ ހަޤީޤަތްތަކެއް ހިމެނިގެންވާ ކަމަށެވެ.

އަދި އެއީ ހަމަ އެކަނި ރޯދަ ހިފުން ނޫންކަމަށާއި ހަމަ އެކަނި ނަމާދުކޮށްލުން ނޫން ކަމުގައިވެސް ޝަހީމް ވިދާޅުވެފައިވެއެވެ.

ސޫރަތުލްބަޤަރާ ގެ 183 ވަނަ އާޔަތުގެ މާނައިގައި ވަނީ : " އޭ ، އީމާންވީ މީސްތަކުންނޭވެ! ތިޔަބައިމީހުންގެ ކުރީގެ އުއްމަތްތަކުގެ މީހުންގެ މައްޗަށް ރޯދަ ފަރުޟު ކުރެއްވުނު ފަދައިން ތިއަބައިމީހުންގެ މައްޗަށް މާތްﷲ ރޯދަ ފަރުޟު ކުރައްވައިފިއެވެ. އެއީ ތިއަބައިމީހުން އެކަލާނގެއަށް ބިރުވެތިވެ ތަޤްވާވެރިވުމަށްޓަކައެވެ." (ހިދާޔަތުގެ އަލި 40)

މި އާޔަތާއި މެދު ވިސްނައިލުމުން އެނގެނީ ރޯދަ ފަރުޟު ކުރެއްވެވުމުގެ އެންމެ ބޮޑު އެއް ޙިކުމަތަކީ އަޅުގަނޑުމެން މާތްﷲ އަށް ބިރުވެތިވުމާއި ތަޤްވާވެރިވުމުގެ މުހިއްމުކަން އަޅުގަނޑުމެންނަށް އަންގަވައިދެއްވުން ކަމެވެ. އެކަންކަން އަޅުގަނޑުމެންނަށް ހަނދުމަކޮށްދެއްވުން ކަމެވެ. އަޅުގަނޑުމެންގެ ދިރިއުޅުމުގައި ހިފޭ ނުރަނގަޅު އާދަތައް ދޫކޮށް މާތްﷲ އެންގެވި މަގަށް އެނބުރި ރުޖޫޢަވުމަށް ދެއްވަވާ ފުރުޞަތެއް ކަމެވެ.

އަޅުގަނޑުމެން އަބަދުވެސް ބިރުވެތިވާންވީ ﷲ އަށެވެ. ނަމަވެސް ދުނިޔަވީ ސަބަބުތަަކާއި ހުރެ އެ ގޮތް ދޫކޮށް ދުނިޔަވީ ބާރުތަކަށް އަޅުގަނޑުމެންގެ ތެރެއިން ބައެއް މީހުންނަށް ބިރުވެތިވެވެނީއެވެ. މިދެންނެވިފަދަ ހުރިހާ ކަމަކުން އަޅުގަނޑުމެން ސަލާމަތްވުމަށް މިބަރަކާތްތެރި ރަމަޟާންމަހުގެ ބޭނުން ހިފަމާތޯއެެވެ!

އާކައިވް ކުރެވިފައިވާ ނުސްޚާ