އަބްދުﷲ ޝާހިދާއި އަމީން ފައިސަލް ވަކިކުރާކަށް ނުދަންނަވަން: ޤާސިމް އެފަދަ ސިޓީއެއް ޤާސިމް ފޮނުއްވިކަމަކަށް އަޅުގަނޑު ނުބުނަން : ޝާހިދު

މިނިސްޓަރ އޮފް ޑިފެންސް އެންޑް ނޭޝަނަލް ސެކިޔުރިޓީ އަމީން ފައިސަލާއި ކުރިން ޑިފެންސް މިނިސްޓްރީގެ ސްޓޭޓް މިނިސްޓަރު ކަމުގެ މަގާމުގައިހުންނެވި އަބްދުﷲ ޝާހިދު އެމަގާމުންވަކިކުރުން އެދި ރައީސުލް ޖުމްހޫރިއްޔާ މުހައްމަދު ނަޝީދަށް ސިޓީއަކުން އަދި އެނޫންގޮތަކަށްވެސް ދަންނަވާފައި ނުވާނެކަމަށް ޤާސިމް އިބްރާހީމް ވިދާޅުވެއްޖެއެވެ.

ސަންދާނު މަޖައްލާގައި ލިޔެފައިވާ ލިޔުމަކާއިގުޅިގެން މިއަދު ނޫހުންކުރި ސުވާލުތަކަށް ޖަވާބުދެއްވަމުން ޤާސިމް ވިދާޅުވީ ސަންދާނު މަޖައްލާގައި ލިޔެގެންއުޅޭ ލިޔުމުގެ ވާހަކަތައް އަޑުއިއވިވަޑައިގެންފައިވާކަމަށާއި ނަމަވެސް އެއީ އެއްވެސް ހަގީގަތެއްހުރިވާހަކަތަކެއް ނޫންކަމުގައެވެ.

އުމަރު ނަސީރު ސިޔާސީ ކަންކަން ކުރަމުންގެންދަނީ ޤާސިމް އިބްރާހީމްގެ އެއްވެސް ލަފައެއް ، އިރުޝާދެއްގެ ދަށުންނޫންކަމަށާއި އެއީ އުމަރު ނަސީރު އޭނާގެ އަމިއްލަ ވިސްނުމުން ކުރަމުންގެންދާ ކަންތައްތައް ކަމުގައިވެސް ޤާސިމް އިބްރާހީމް ވަނީ ވިދާޅުވެފައެވެ.

އެމަނިކުފާނު ވިދާޅުވިގޮތުގައި ރިޔާސީ ކެމްޕޭނުގައިވެސް އުމަރު ނަސީރުގެ އައިޑީޕީއިން ވަނީ ޖުމްހޫރީ ޕާޓީންކުރި މަސައްކަތްތަކަށް ތާއީދުުނުކުރުުމާއިއެކު މުހައްމަދު ނަޝީދު ހޮވަން ކުރިމަސައްކަތްތަކަށް ފާޅުގައި ދެކޮޅުހަދާފައެވެ.އެފަދަ ސިޔާސީ ގުޅުމެއް އޮތްނަމަ ރިޔާސީ އިންތިޚާބަށް ކެމްޕޭނުކުރި ދުވަސްވަރު އުމަރު ނަސީރުގެ އެއްބާރުލުން ލިބެންޖެހޭނެކަން ފާހަގަކުރެއްވެވިއެވެ.

" އުމަރު ނަސީރާއި އަޅުގަނޑާއި ހިއްސާވާ ވިޔަފާރިއެއް އޮތުމަކުން އުމަރު ނަސީރު އޭނާގެ އަމިއްލަ ވިސްނުމާއި އެއްގޮތަށް ކުރިއަށް ގެންދާ ސިޔާސީ ހަރަކާތްތައް ކުރިއަށް ގެންދަނީ އަޅުުގަނޑު ބޭނުންވާހައިގޮތަކަށްކަމަށާް ގަބޫލުކުރަން ނުޖެހޭނެކަން އުމަރު ނަސީރުގެ ސިޔާސީ ހަރަކާތްތަކުން އެންމެންނަށް ސާބިތުވެފައިވާ " ކަމުގައިވެސް ވިދާޅުވެފައިވެއެވެ.

ޤާސިމް ވިދާޅުވީ އެމަނިކުފާނަކީ އެއްވެސް އިރެއްގައި ސަރުކާރުގެ ވަކިމަގާމެއް ނުވަތަ އެއްވެސް ބޭނުންފުޅުުވެގެން އުޅުއްވި އަދި އުޅުއްވާނެވެސް ބޭފުޅެއް ނޫންކަމަށާއި ހޯމް މިނިސްޓަރކަން ގަބޫލުފުޅުކުރެއްވެވީވެސް ޕާޓީ ކައުންސިލުން އެކަން ނިންމުމުން ކަމުގައެވެ. މަގާމުގައި ހުންނަވަން ފެނިވަޑައިނުގަތުމުން އަމިއްލަފުޅަށް އިސްތިއުފާ ާދެއްވައި ދުރުގައި ހުންނަވަނީ ކަމުގައިވެސް ވިދާޅުވިއެވެ.

އެއްވެސް އަސްލެއްނެތި ސަންދާނު މަޖައްލާގައި ލިޔެފައިވާ ހަގީގަތާއި ޚިލާފުލިޔުން ލިޔުމުގެ މަގުސަދަކީ ގައުމުގައި ފިތުނަ ފަސާދަ އުފައްދައި ހަމަނުޖެހުން އިތުރުކުރުވުން ކަމަށް ގަބޫލުފުޅުކުރައްވަންތޯ މިހާރު ސަރުކާރު ހިންގަމުންގެންދާ އެމްޑީޕީގެ ގައުމީ މަޖިލީހުގެ މެންބަރަކާއި ސުވާލުކުރުމުން ވިދާޅުވީ ތިއަކަންކަމުގައި ގޮތް ނިންމާނީ ރައްޔިތުން ކަމަށާއި ދިވެހިރައްޔިތުންނަކީ މީހަކު ނުވަތަ ބައަކު ދައްކާހައި ވާހަކަތަކެއް ގަބޫލުކޮށް އެކަންކަމަށް އަމަލުކުރާވަރަށްވުރެ މާބޮޑަށް ހޭލުންތެރި ބައަކުކަމުގައި ގަބޫލުކުރައްވާކަމށެވެެ. އެންމެން ގުޅިގެން ގައުމާއިގެން ކުރިއަށްދާން މަސައްކަތްކުރަންވީވަގުތަކު ހަގީގަތާއި ޚިލާފު ވާހަކަތައް ފަތުރައި ފިތުނަވެރިކަން އުފައްދައި ބައިބައިކުރަން މަސައްކަތްކުރާތީ އެކަން ވަރަށް ބޮޑަށް ކުށްވެރިކުރައްވާކަމުގައިވެސް ވަނީ ވިދާޅުވެފައެވެ.

މިކަމާއިގުޅިގެން އަބްދުﷲ ޝާހިދަށް ދަންނެވުމުން ވިދާޅުވެފައިވަނީ ސަންދާނު މަޖައްލާގައި ޤާސިމް އިބްރާހީމް ވިދާޅުވިކަމަށް ޝާހިދާއި ހަވާލާދީ ބަޔާންކޮށްފައިއެވާ ވާހަކަތަކަކީ އެމަނިކުފާނު ދެއްކެވި ވާހަކަފުޅުތަކެއް ނޫންކަމުގައެވެ. " ފަހަލަ ސައީދު އަޅުގަނޑާއި ބައްދަލުކުރީ ސަންދާނު މަޖައްލާގައި ލިޔަމުންގެންދާ އަޅުގަނޑު ހިޔުމަން ރައިޓްސް ކަމިޝަނަށް ފޮނުވި ސިޓީގެ ޚަބަރާއި ގުޅޭގޮތުން ވާހަކަދައްކަން. އެބައްދަލުކުރުމުގައި ފަހަލަ ސައީދު އަޅުގަނޑާއި ކުރި ސުވާލަކަށް އަޅުގަނޑު ޖަވާބުދިނީ. އަޅުގަނޑު ބުނީ އަޅުގަނޑުވެސް މީހުން ތިއަޒާތުގެ ވާހަކަތައް ދައްކާވާހަކަ އަޑުއަހާފައިވާކަމަށް. ނަމަވެސް އަޅުގަނޑު އެފަދަ އެއްވެސް ކަމެއްގެ ވާހަކައެއް ނުދައްކަން. މިދެންނެވީ އަޅުގަނޑު މަގާމުން ވަކިކުރަން ބޭނުންވެގެން ޤާސިމް ރައީސަށް ސިޓީފުޅެއް ފޮނުއްވިކަން އަޅުގަނޑަށް އެނގިފައިވާކަމުގައި އަޅުގަނޑެއް ނުދަންނަވަން. އަޅުގަނޑު ދެންނެވީ އަޅުގަނޑު ކައިރީގައި ބައެއް މީހުން އެފަދަ ވާހަކަތައް ދައްކައޭ " މިހެންކަމުގައެވެ.

ޝާހިދު ވިދާޅުވިގޮތުގައި މިކަމާއި ބެހޭގޮތުން އެމަނިކުފާނު ގަބޫލުކުރައްވާގޮތާއި ދެކެވެމުންދާ ވާހަކަތަކާއި ވަރަށް ތަފާތެވެ. އަދި ރައީސުލްޖުމްހޫރިއްޔާވެސް އަދި އެއޮފީހުގެ އެއްވެސް ބޭފުޅަކުވެސް މިފަދަ އެއްވެސް ކަމަކަށް އެމަނިކުފާނަށް އިޝާރާތްކުރައްވާފައެއްވެސް ނުވެއެވެ.

ޝާހިދު އިތުރަށް ވިދާޅުވިގޮތުގައި އެމަނިކުފާނަކީ އެހެން މީހުންގެ ވާހަކަ ދައްކަވަން ބޭނުންފުޅުވެވަޑައިގަންނަވާ ބޭފުޅެއްނޫނެވެ. އަދި ޔަގީންކަން ނެތް ވާހަކަތައް ފަތުރައި ފިތުނަ ފަސާދަ އުފެއްދުމަށް މަގުފަހިކުރުމަކީ އެމަނިކުފާނު ވަރަށް ބޮޑަށް ނަފުރަތު ކުރައްވާކަމެއް ކަމުގައިވެސް ވަނީ ވިދާޅުވެފައެވެ.

މިކަމާއި ގުޅިގެން އުމަރު ނަސީރު ރާއްޖެއިން ބޭރުގައި ހުންނަވައިގެން މިއަދު ނޫހަށް ދެއްވި ބަސްދީގަތުމެއްގައި ވިދާޅުވެފައިވަނީ ފަހަލަ ސައީދުމެންނަށް ކަންކަން އެނގުމުގައި މައްސަލަތަކެއް އެބަހުރިކަމަށެވެ. އަދި އައިޑީޕީއިން ނުވަތަ އުމަރު ނަސީރު ހިންގަވާ ސިޔާސީ އެއްވެސް ކަމެއްގައި ޤާސިމް އިބްރާހީމްގެ މަޝްވަރާއެއް ހޯއްދަވާފައި ނުވާނެކަމަށާއި އަދި އެއްވެސް ލަފާފުޅެއް ދެއްވާފައިނުވާކަމަށްވެސް ވަނީ ވިދާޅުވެފައިވެއެވެ.

އުމަރު ވިދާޅުވީ ޝާހިދާއިމެދު މިހައިތަނަށް ހާމަވެފައިވާ މައުލުމާތުގެ މައްްަށް ބަލައި އުމަރާއި އައިޑީޕީގެ ވިސްނުމަށް ދިވެހިރައްޔިތުންގެ ގިނަބައަކު ތާއީދުކުރާކަމަށާއި އެކަން ބަދަލުކުރެވޭނީ އިތުރު ހަގީގަތްތަކެއް ހާމަވެގެން ކަމުގައެވެ.

ނޮވެމްބަރު 3ގެ އުދުވާނީ ހަމަލައާއި ގުޅުންހުރި އަދި މިހައިތަނަށް ޖަވާބު ނުލިބޭ ސުވާލުތަކުގެ ޖަވާބު ހޮއްދެވުމަށް ރައީސުލްޖުމްހުރިއްޔާގެ އޮފީހުން މަސައްކަތްކުރައްވަމުންގެންދަވާކަމަށް ޕްރެސް ސެކެޓްރީ މުހައްމަދު ޒުހައިރުވަނީ ހާމަކުރައްވާފައެވެ.

އަބްދުﷲ ޝާހިދު މަގާމުންވަކިކުރުމަށް ގޮވާލައި ޖުމްހޫރީ މައިދާނުގައި ބޭއްވި މުޒާހަރާގައި ޖުމްހޫރީ ޕާޓީން ބައިވެރިނުވާކަންވެސް ފާހަގަކުރެވެއެވެ.

ސަންދާނު މަޖައްލާގައި އަބްދުﷲ ޝާހިދާއި ހަވާލާދީ ލިޔެފައިވާ ލިޔުމަކީ އަބްދުﷲ ޝާހިދު ދެއްވި މައުލުމާތުގެ މައްްަސް ލިޔެފައިވާ ލިޔުމެއް ނޫންކަމަށާއި އެލިޔުންލިޔެފައިވަނީ ފަހަލަ ސައީދު އަމިއްލައަށް ފެންގޮތަކަށްކަމަށް އިތުބާރުހުރި ފަރާތަކުންވަނީ މިއަދު ނޫހަށް މައުލޫމާތު ދެއްވާފައެވެ.

އާކައިވް ކުރެވިފައިވާ ނުސްޚާ