ކީރިތި ޤުރުއާނުގެ ދިވެހި ތަރުޖަމާގައި ކުށްހުރީ އެފޮތް މައުމޫނުގެ ކެމްޕޭނުގެ ހަތިޔާރަކަށް ބޭނުންކުރާނެކަން މާތްﷲ ދެނެެވޮޑިގަންނަވާތީ ލެއްވި…

ކީރިތި ޤުރުއާނުގެ ދިވެހި ތަރުޖަމާގައި ކުށްހުރީ އެފޮތް މައުމޫނުގެ ކެމްޕޭނުގެ ހަތިޔާރަކަށް ބޭނުންކުރާނެކަން މާތްﷲ ދެނެެވޮޑިގަންނަވާތީ ލެއްވި ކޯފާއަކުންކަމަށްވުމަކީ ވަރަށްގާތްކަމެކެވެ.

އަރަބިބަހުން ލިޔެވިފައިވާ އާޔަތްތަކުގައިހުރި ކުށްތައް ނުކަނޑައި ކީރިތި ޤުރުއާނުގެ ދިވެހިތަރުޖަމާ އިތުރަށް ނުބެއްސެވުމަށާއި މިހާރު ބައްސަވާފައިވާ ޚަތިމްތައްވެސް އަނބުރައި ސަރުކާރަށް ނަންގަވަން ނިންމެވި ނިންމެވުމަށް އަޅުގަނޑުމެން މަރުހަބާކިޔަމެވެ.

ކުށުގެ އިސްލާހުގެ ގޮތުގައި ކުށްތަކުގެ އިސްލާހީ ލިސްޓު ގަނޑެއްގައި ޗާކުކުރައްވައި ޚަތިމަށް އެޓޭޗްކުރެއްވުމަކީ މައްސަލައިގެ ހައްލެއްނޫނެވެ. ތަރުޖަމާ ކިޔަމުންދާއިރު އެގަނޑު ހުޅުވައިގެންއިނދެ އެގަނޑަށް ބަލައިގެން އާޔަތްތައް ކިޔުމަކީ އެއްވެސް ހާލެއްގައި ކުރެވޭނެކަމެއްނުނެވެ.

މައުމޫނުގެ ކަލާނގެވަންތަކަން ގަބޫލުކޮށް މައުމޫނިއްޔަ ދީން ފަތުރަންއުޅޭ ގުބައިދާއި މޫސާ ނިޝޒާރުވަނީ މިކަން މިގޮތަށްކުރުމުން ފުދޭނެކަމަށް ބުނެފައެވެ. ނަަމަވެސް މިއީއަކީ އެއްވެސް ހާލެއްގައި މިކަމަށްއޮތް ހައްލެއްކަމަކަށް ގަބޫލެއްނުކުރެވެއެވެ.

ރައްޔިތުންގެ ފައިސާއިން 25 މިލިއަން ރުފިޔާ ހަމައެކަނި ޗާޕުކުރުމަށް ޚަރަދުކުރެވިފައިވާ ތިރީސް އަހަރު ދުވަހުން މައުމޫނު ކުށްކަނޑައިގެންނެރުނު ކީރިތި ޤުރުއާނުގެ ދިވެހި ތަރުޖަމާ އަލުން އަނބުރައި ސަރުކަރަށް ނަންގަވަން ނިންމަވައިފިއެވެ. ކުށްތައް ގިނަކަމުން ބޮޑެތި މައްސަލަތައް ނުކުންނާނެތީއެވެ.

30 އަަހރުވަންދެން ކީރިތި ޤުރުއާން ތަރުޖަމާކުރުމުގެ ނަމުގައި މައުމުނު އެނބުރި ގޭސްގަނޑުގެ ސައިފޮދުގެބިލް އެކަނިވެސް އެތައްމިލިއަނަކަށް އަރާނެކަން ޔަގީނެވެ. މިކަމުގައި ގެންގުލުނު ބަޔަކަށް ދިން އެއްޗެއް އެނގޭނީ މައުމޫނަށެވެ. ޔަގީންވާކަމަކީ ޗާޕުކުރަން ޚަރަދުކުރި 25 މިލިއަން ރުފިޔާއަށްވުރެ އިތުރުން އެތައް މިލިއަން ރުފިޔާތަކެއް ޚަރަދުވެފައިވާނެކަމެވެ.

މިކަމާއިގުޅިގެން އިއްޔެ މިނިސްތަރ އޮފް އިސްލާމިކް އެފެއަރޒް ޑރ. އަބްދުލްމަޖީދު އަބްދުލް މަޖީދު ނޫސްވެރިންނަށްވަނީ މައުލޫމާތު ދެއްވާފައެވެ.

ކުރީގެ ސަރުކާރުން ޗާޕްކޮށް ގިނައަދަދެއްގެ ކޮޕީ ބަހާފައިވާ ކީރިތި ޤުރުއާނުގެ ދިވެހި ތަރުޖަމާގައި މަދުވާ ސކުންތަކުގެ އިތުރުން ކީރިތި ޤުރުއާނުގެ އާޔަތްތައް އަރަބިބަހުން ލިޔުމުގައި އެކަނިވެސް ސަތޭކަ ފަސްދޮޅަހަށްވުރެގިނަ ކުށް ހުރިކަން މިހައިތަނަށް ފާހަގަކުރައްވައި މިނިސްޓްރީ އޮފް އިސްލާމިކް އެފެއަރޒްއަށް ހުށަހަޅުއްވާފައިވާތީ މިހައިތަނަށް ކުރީގެ ސަރުކާރުން ބަހާފައިވާ ކީރިތި ޤުރުއާނުގެ ދިވެހި ތަރުޖަމާގެ ހުރިހައި ކޮޕީތަކެއް އެމިނިސްޓްރީއަށް ނަންގަވާގޮތަށް މިހާރު ހަމަޖައްސަވާފައިވާކަމަށް މިނިސްތަރ އޮފް އިސްލާމިކް އެފެއަރޒް ޑރ.އަބްދުލްމަޖީދު އަބްދުލްބާރީ މިއަދު ނޫސްވެރިންނަށް މައުލޫމާތުދެއްވަމުން ހާމަކުރައްވައިފިއެވެ.

އިސްލާމީ މަރުކަޒުގެ މައިހޯލުގައި މިއަދު ބޭއްވި ޕްރެސް ކޮންފަރެންސްގައި މިނިސްޓަރ ޑރ. އަބްދުލްމަޖީދު ވިދާޅުވީ މިމައްސަލަތައް އެމިނިސްޓްރީން ހުށަހަޅުއްވަން ގަސްދުކުރައްވަވާފައިވަނީ ރާއްޖޭގައި އިސްލާމީ ކަންތައްތައް ކުރިއަށް ގެންދިއުމަށް އެމިނިސްތްރީއަސް ލަފާދެއްވައި އެހީތެެރިވެވަޑައިގަތުމަށް އުފައްދަވާ ފިޤްހު އިލްމުވެރިންގެ އެކަޑަމީން ކަމުގައެވެ.

މިނިސްޓަރ ޑރ. އަބްދުލްމަޖީދު ވިދާޅުވިގޮތުގައި އެމިނިސްޓްރީން ބޮޑަށް މަސައްކަތްކުރައްވަވާނީ ކުށްތައް އިސްލާހުކުރައްވައި މިހާރު ޗާޕުކުރެވިފައިހުރި ތަރުޖަމާތައް ބޭނުންކުރެއްވުމަށެވެ. ނަމަވެސް މިކަމަކީ ކުރެވޭވަރުގެ ކަމެއްކަމާއިމެދު ގޮތެއް ނިންމަވާނީ ފިޤުހު އިލްމުވެރިންގެ އެކަޑަމީން ކަމުގައިވެސް ވިދާޅުވިއެވެ.

ޗާޕުކުރެވިފައިވާ ދިވެހިތަރުޖަމާގައި ކުށްހުރިކަން ފާހަގަކުރައްވައި އެތަރުޖަމާ ޗާޕުކުރި ނޮވެލްޓީ ޕްރެސްއިންވެސް ވަނީ ކުށުގެ ލިސްޓެއް ހުށަހަޅުއްވާފައިކަމަށާއި އަދި ރައީސުލްޖުމްހޫރިއްޔާގެ އޮފީހުންނާއި ޖަމިއްޔަތުލް ސަލަފާއި އަދާލަތު ޕާޓީގެ ރައީސް ހުސައިން ރަޝީދު އަހްމަދުވެސްވަނީ ކުށްތަކުގެ ލިސްޓް ހުށަހަޅުއްވާފައިކަމަށް ޑރ. އަބްދުލްމަޖީދު ވިދާޅުވިއެވެ.

މިކަމަކީ ސަރުކާރުގެ ފައިސާއިން 25 މިލިއަން ރުފިޔާވަރުގެ ބޮޑުޚަރަދެއްކުރެވިފައިވާ ކަމަކަށްވާއިރު މިފޮތްތައް އުވައިލުމަކީ ދެންއެހެންގޮތެއްނެތިގެންނޫނީ ކުރަންވާވަރުގެ ކަމެއްނޫންކަމަށާއި ނަަމަވެސް ދެން އެހެން ގޮތެއްނެތިއްޖެނަމަ އެކަންވެސް ކުރައްވާނޭކަމަށް ޑރ.މަޖީދު ވިދާޅުވިއެވެ.

ކީރިތިޤުރުއާން ދިވެހިބަހަށް ތަރުޖަމާކޮށްގެން ޗާޕުކުރިއިރު ބައެއް އާޔަތްތަކުގެ މާނަ ދިވެހިބަހުން ލިޔެފައިވަނީ އެންމެ ފުރިހަމަ އިބާރާތުން ފަސޭހަކަމާއިއެކު މާނަދެނެގެނެވޭގޮތަށް ނޫންކަމަށް ބައެއްފަރާތްތަކުން ތުހުމަތުކުރާތީ އެކަމާއިމެދު ދެކެވަޑައިގަންބަވާގޮތަކީ ކޮބައިތޯ މިއަދު ނޫހުން ޑރ. މަޖީދަށް ސުވާލުކުރުމުން އެމަނިކުފާނުވިދާޅުވީ އެމަނިކުފާނަށް އެކަންކަން އެގޮތަށް ހުރިކަން ފާހަގަކުރައްވައި ހުށަހެޅުއްވި ކަންތައްތައް އިސްލާހުކުރައްވާކަމަށާއި އިތުރަށް އެފަދަ ކަމެއްހުރިތޯ ބައްލަވަމުންގެންދަވާކަމުގައެވެ.

އާކައިވް ކުރެވިފައިވާ ނުސްޚާ